PREGÓN CORESMAL

Esperta! Comeza a Coresma.

Esperta! Comezan corenta días de oportunidade.

Esperta! Vive este tempo en camiño, sen instalarte, sen retelo.

Esperta! Pon un calzado apropiado e revístete de moita paciencia contigo mesmo.

Esperta! Alixeira a equipaxe, entra convencido no deserto e camiña con paso lixeiro.

Esperta! Despexa a túa mente, abre o teu corazón.

Esperta! Énchete de esperanza e do optimismoque dá ás e fai crecer.

Esperta! Comeza a Coresma.

Nesta Coresma dáte tempo para traballar a túa mirada,

para poñer os ollos fixos noutro tempo, a Pascua, un tempo definitivo;

enche de tenrura e de misericordia as túas entrañas,

deixa que o Deus que todo o converte e dignifica no amor,

te converta e e te ame sen medida.

Nesta Coresma déixate mexer pola brisa do Espírito de Deus:

pon o teu corazón en sintonía cos seus latexos e berra o berro dos aflixidos,

bebe da Palabra, da reconciliación, da oración persoal e comunitaria

e non te deixes enganar polos espellismos do deserto.

Nesta Coresma baixa de onde esteas aos camiños da vida,

baixa sen medo e déixate sorprender polo misterio de cada persoa e acontecemento.

Vive ben esperto, camiña só pero tamén en comunidade,

abastécete de moita fe, de moita esperanza e de máis amor.

Nesta Coresma practica o xaxún verdadeiro,

ese que afasta do consumismo, da crítica e da indiferenza;

suaviza o teu corazón de pedra e dá paso á sensibilidade,

á tenrura, á compaixón e á indignación tinguida de propostas.

Nesta Coresma practica o perdón e a reconciliación,

déixate acoller e abrazar, perdoar e pacificar;

pecha a porta á tristura e ao desencanto

e abre todas as ventás da túa casa ao sol que nace do alto

e que nos fala de ilusión, de beleza e de solidariedade compartidas.

Nesta Coresma aproveita e dedica tempo para espertar á conversión,

para optar ante as tentacións, para descubrir ante a transfiguración,

para saciar a sede como a samaritana,

para ser como o cego de nacemento,

para vivir como Lázaro e para entregarte como Xesús.

É tempo de Coresma, é o teu tempo. Aprovéitao!

Bo camiño.